Stundum kemur þögnin

     Ég er þreyttur og hugsi, en mér líður vel.  Kúturinn lætur mig finna fyrir því og vill bara vera í fanginu á mér.  Vildi ekki sofna í gærkveldi og lá þétt upp við mig í nótt.  Við fórum á fætur um sex leytið og erum því þreyttir.  Þetta ljóð Tómasar kom upp í huga minn í kvöld svo ég fletti upp á því.  Ég veit samt að það hefur fennt yfir sporin svo það er engin ástæða til að kyssa þau þótt margar séu fallegar minningarnar.  Látum það duga.

 

 

Kyrrðin andar svefnljóði

sorgir dagsins á,

meðan dökkva dregur

á dalvötnin blá.

 

Silfur mánans sindrar

um snævi þakin fjöll.

Við lýsigull og leiftur

hún ljómar, kvöldsins höll.

 

Og leiftur hvert, sem ljómar,

er lítið ævintýr.

Svo margt, sem enginn minnist,

und mánans faldi býr.

 

Nú hvarfla þau í hug mér

hin horfnu gömlu ljóð,

sem mjöllin las mér ungum

við mánans bleika flóð.

 

Þau seiddu mig til drauma

en dagur rann úr sjá,

og köldum feigðarfölva

á fjöll og dali brá.

 

En aftur rísa úr öskunni

ævintýrin mín-

Minningarnar leiftra

og lýsigullið skín.

 

Þótt flest sé nú breytt orðið

frá því , sem var,

er máninn ennþá samur

og samar stjörnurnar.

 

Og söm er lögð um sædjúpið

silfurgeislans brú.

Hér komum við er kyrrt var

á kvöldin, ég og þú.

 

Ég veit það ekki ennþá

hvort ást ég bar til þín,

en um þig söng ég alla daga

æskuljóðin mín.

 

Og stundum, þegar heimleiðis

hélt ég einn til mín,

á hjarnið kalda kraup ég lágt

og kyssti í sporin þín.

 

Minningarnar leiftra

og lýsigullið skín.

Nú dreymir mig um ókomnu

ævintýrin mín.

 

En stundum kemur þögnin

og þylur gömul ljóð.

Þá þrái ég enn að þakka

hvað þú varst mild og góð.

 

Svo yndislega æskan

úr augum þínum skein.

Svo saklaus var þinn svipur

og sál þín björt og hrein.

 

Og ljúft sem liðinn draumur

ein löngun vitjar mín,

að krjúpa á hjarnið kalda

og kyssa í sporin þín.

 

Tómas Guðm.

Athugasemdir

[Jónína Dúadóttir, 23.1.2008 kl. 06:01]

Jamm Tómas stendur upp úr hjá mér

Eigðu góðan dag í Kútakoti

[Jónína Dúadóttir, 25.1.2008 kl. 09:41]

Til hamingju með daginn, ég sendi þér falleg blóm... í huganum

[Greta Björg Úlfsdóttir, 25.1.2008 kl. 10:54]

Fallegt ljóð.

[Brattur, 25.1.2008 kl. 19:34]

... af hverju yrkir engin svona lengur?