Sá sem lætur undan, sigrar allt!

     Við lítum i kringum okkur og viljum gjarnan vera öðruvísi.  Einblínum á mýkt okkar og  teljum hana veikleika okkar og helti.  Skömmumst okkar fyrir værðina og horfum öfundaraugum á óværðina og ysinn.   Viljum fara hraðar yfir, afkasta meiru; skjótari ákvarðanir og  leiftursnöggar framkvæmdir.  Standa stolt uppi á stól og horfa yfir.

 

     En hvað með hið bljúga og blíða?  Komumst við eitthvað áfram með slíkt veganesti.  Er það ekki bara ávísun á væmni og væskilshátt.  Gefa eftir, hörfa, draga í land, láta undan, pakka niður, taka til fótanna.  Er það ekki dapurleg „sókn“ í baráttunni? 

 

     Getur verið að það sé eins og með vatnið?  Værðarlegt, eftirgefanlegt, bljúgt, finnur sér aðra leið ef sett er fyrirstaða og leitar alltaf til upphafsins.

 

 Ógnarkraftur sem fer þó aðrar leiðir.  Kraftur hins bljúga og blíða!

 

 

Sjá vatnsins dreymnu ró við klettsins rönd,

það rennur hægt og færist vart úr stað.

Það víkur undan barnsins blíðu hönd,

en björgin sverfur magn þess allt um það.

 

Það vinnur hljótt, uns verk er fullkomnað.

Það vílar ei, þótt lagt það sé í bönd.

Það letrar sína sögu á tímans blað,

þótt sökkvi fjöll og aftur rísi lönd.

 

Já , það sem hamast, oftast skammvinnt er,

og eftir það ei lengi merki sér,

því afl hins sterka er furðu-veikt og valt.

 

Slíkur er kraftur þess hins bljúga og blíða,

að bug það vinnur á því harða og stríða,

og sá, sem lætur undan, sigrar allt.

Jakob Jóh. Smári

 

Njótið dagsins og rigningarinnar.

Athugasemdir

[Jónína Dúadóttir, 9.5.2008 kl. 08:23]

Vatnið og allt þetta bljúga og blíða fær sannarlega mitt atkvæðiÉg hef alltaf trúað því að góðmennskan fleyti mér lengra en harkan og það virkar alltaf

Hlýtt faðmlag inn í daginn handa þér frá mér, bestu kveðjur.... Járnfrúin

[Anna, 9.5.2008 kl. 08:47]

Fallega orðað - gerist varla betra. Takk fyrir þetta og eigðu sömuleiðis góðan dag.

[Guðný Bjarna, 9.5.2008 kl. 10:29]

texti Júdasr og ljóðaval þennan daginn er eins og besta "konfekt" takk

[múmínstelpan (IP-tala skráð) 9.5.2008 kl. 13:29]

[Sporðdrekinn, 9.5.2008 kl. 14:04]

Ég trúi að það blíða og góða.

Samlíking þín er falleg og góð. Ég held að við getum allt sem að við ætlum okkur og að það sé betra að taka sér smá tíma í að vinna málin og gera þau vel svo að þau standi. Í stað þess að vinna málin með látum og yfirgangi, þá er hætta á að brestur komi í og sigurinn því ekki eins sætur.

[Ein-stök, 9.5.2008 kl. 20:32]

Flottur texti og yndislegt ljóð í stíl við  Allt vinnst betur með hægðinni (alltaf gott að minna sig á það)

Takk í dag og eigðu ljúft kvöld

[Edda (IP-tala skráð) 9.5.2008 kl. 21:29]

Virkilega fallegt - takk.  Já, ég trúi á kraft hins bljúga og blíða

K.kv. E.

[Fiðrildi, 9.5.2008 kl. 22:45]

Smart færsla og að mínu mati mikið vit.

[Rebbý, 10.5.2008 kl. 11:34]

sá vægir sem vitið hefur .... ertu ekki bara gáfaðri en svo að fara með æsingi og látum í gegnum þrautir lífsins