Einn kemur þá annar fer

     Þetta er yndislegur dagur.  Þótt eldri kúturinn hafi farið til Þorpsins með kærustunni og  á móðurslóðir kom sá litli til mín í fyrradag.  Ég heyrði pabbahrópin utan af bílastæði þar sem ég sat við eldhúsborðið þreyttur eftir mikla vinnu og ekki frá því að stress ásamt mikilli kaffidrykkju sé farið að segja til sín.  Við okkur brosir þessi fallega helgi og einmanaleg borgin sem verður bæði myndræn og ljóðræn í þessum tómleika sem á henni dynur um Verslunarmannahelgar og líklega bætist við fallegt kyrrlátt regn og fullkomnar þetta.  Það virðist þó ævinlega vera einhver seiðandi ljómi yfir henni á slíkum dögum og það er eins og borgin láti þreytuna á ys og þys hversdagsins líða úr sér og sýni okkur fegurð sýna á allt öðrum nótum en venjulega enda ekkert sem truflar.   Því munum við feðgar, uppteknir hvor af öðrum fara víða og ekkert sem gæti truflað okkur í því að bæta hvor öðrum upp þann tíma sem fjarlægðin hafði af okkur.  

     Hann hringdi í mig í gærkveldi, eldri kúturinn og spurði mig hvort ég væri búinn að gleyma sér því ég hafði ekkert hringt í hann frá því hann fór.  Hann á það til að rukka mig um áhyggjurnar sem ég á að hafa af honum en ég vildi nú bara leyfa honum að vera í friði í móðurfaðmi en fékk að vita það að faðmurinn hafði ákveðið að farið úr bænum svo hann og kærastan fengu inni í bílskúr hjá bróður hans  en verða hinsvegar að sturta sig hjá afa og ömmu.  Örlítið öðruvísi en ætlað var en nægjusemin og æðruleysið kom til bjargar.

     Njótið dagsins

Athugasemdir

[Rebbý, 2.8.2008 kl. 11:21]

já borgin er yndisleg núna ... sést ekki bíll á ferð út um stofugluggann minn
njóttu helgarinnar með litla kút, vona að stóri kútur njóti sín þrátt fyrir breytingarnar á helgarplaninu

[múmínstelpan (IP-tala skráð) 2.8.2008 kl. 13:39]

..æi var einmitt að hugsa til Júdasar...kannski kannski liggja sporin í kross um helgina...

[Sporðdrekinn, 2.8.2008 kl. 14:57]

Ljúfa helgi

[Jónína Dúadóttir, 3.8.2008 kl. 06:42]

Sé að helgin er hingað til yndisleg hjá þér og vona að hún haldi því áfram

[Jónína Dúadóttir, 9.8.2008 kl. 12:12]

Hvar ert þú minn kæri ?