Læs á gamlar rætur

     Með gleði í hjarta en brotið bak staulaðist Júdas á fætur í morgun.  Gamli hélt augnablik að hann væri unglamb og náði að ganga fram af sér við æfingar gærdagsins.  Í ofanálag komst lítill kútur að því að pabbinn væri ekki eins frár á fæti og venjulega og var því á harðahlaupum um íbúðina í gærkveldi og nýtti sér þetta til hins ýtrasta.  Furðulegt hvað þau finna þetta á sér og felustaðirnir voru ekki af verri endanum.  Hann vorkenndi mér þó á köflum, strauk mér og breiddi ofan á mig en var með það alveg á hreinu að hann stjórnaði í ástandinu.  Unglingskútur var með þetta alveg á hreinu og stakk upp á að ég fengi mér annað áhugamál sem ég réði við og var þar boccia nefnt ásamt einhverri augnaleikfimi fyrir eldri borgara.

     Skólinn fer að byrja hjá okkur feðgum og satt best að segja er komið haust í huga minn og ég er ekki frá því að gróðurinn í garðinum hjá mér taki undir það sé lesið í hann.  Það er eins og eitthvað seiðandi fylgi haustinu og ég hlakka til þess.   Annar vetur í einsemd hugans blasir við og ekki laust við að ég komi sjálfum mér á óvart en hver veit.  Hvort ég skjóti rótum í einsemd til framtíðar veit ég ekki en það veldur mér þó litlum áhyggjum þessa stundina og ómögulegt að segja til um það hvort gamlar rætur eigi eftir að koma á óvart.  Kútarnir, vinnan og námið ásamt einhverjum æfingum ættu að geta haft ofan af fyrir mér og vonandi kemst ég á skrið í blogglestri en þar hef ég verði einstaklega slappur í sumar. 

Njótið dagsins

 

 

Mestur sársauki fylgir gróðrinum,

hann gerir okkur læs

á gamlar rætur;

þær rísa upp

og fljúga,

en ekki úr augsýn.

 

Laufkrónan snertir ský.

Laufkrónan kyssir fætur okkar.

 

Jóh.Hjálm

Athugasemdir

[Jónína Dúadóttir, 18.8.2008 kl. 08:26]

Unglingurinn þinn er algert æði... boccia og augnaleikfimi fyrir gamalt fólkHann er greinilega með svipaðan húmor og "sá gamli" og það er góður húmorEigðu góðan dag minn kæri

[Rebbý, 18.8.2008 kl. 08:27]

sá um helgina ungan pilt aftur í bíl með karlmann undir stýri og galopinn gluggann og hendi út í rigningunni ..... ákvað alveg að þetta væruð þið kútafeðgar
hlakka til haustsins, það er fallegasti tími ársins

[múmínstelpan (IP-tala skráð) 19.8.2008 kl. 10:29]

..múmíngustur..

[Júdas, 22.8.2008 kl. 17:52]

Þið eruð ljúfar, ég er viss um að þar voru kútafeðgar á ferð. 

Múmín-haustgustur..........með rigningu kannski?   

[Jónína Dúadóttir, 22.8.2008 kl. 19:54]

Já þú ert þarna

[Linda Lea Bogadóttir, 24.8.2008 kl. 13:21]

Oh! já sumarið er horfið hjá með öllum sínum undrum og stórmerkjum eða ekki... Það er bara gott að nú fara fastir liðir eins og venjulega af stað af fullum krafti og þá væntanlega bloggið líka.

Eigðu góðan silfurdag í dag...